ఈ నవల గురించి తెలియనివారికి కేవలం ఇదో చోరశాస్త్రం మాత్రమే – తెలిసిన వారికి ఓ గుప్తజ్ఞాన శాస్త్రం
ఋషి సాంప్రదాయంలో పేర్కొనబడిన అరవై నాలుగు కళల్లో చోరకళ యాభైతొమ్మిదవ స్థానంలో వుంటుంది. శ్రీకృష్ణుడు తన చోరకళతో గొల్లభామల కుండల్లోని వెన్నను దొంగిలించడం వెనుక ఒక సందేశం, ఒక ప్రభోదం వుంది. అందుకు వేదికగా గోకులాన్ని ఎంచుకున్నాడు. అక్కడ తను దొంగిలించింది కేవలం వెన్నను మాత్రమే కాదు, దాని ద్వారా మానవులకు ఓ ముక్తి మార్గాన్ని చూపించాడు.
గురువును వెతుక్కుంటూ శిష్యులు వెళ్ళడం సర్వసాధారణం. కానీ, గురువే శిష్యుణ్ణి వెతుక్కుంటూ వెళ్ళడం అసాధారణం. రాముణ్ణి వెతుక్కుంటూ విశ్వామిత్రుడు, కౌరవ పాండవులను వెతుక్కుంటూ ద్రోణాచార్యుడు వెళ్ళడం మనకు తెలిసిన కథలే.
సాధారణంగా తన దగ్గరికి వచ్చిన శిష్యులను రకాలుగా పరీక్షించిన తరువాతనే గురువు వారిని తన గురుకులంలోకి తీసుకోవడం జరుగుతుందన్న విషయం కూడా మనకు తెలిసిందే. అందుకు భిన్నంగా వివేకానందుడు తన గురువుగా రామకృష్ణపరమహంస తగినవాడా? కాదా? అన్న పరీక్షపెట్టిన తరువాతనే స్వీకరిస్తాడు. గురుశిష్య పరంపరలో ఇటువంటి అనేక విలక్షణ వృత్తాంతాలు మనకు తెలిసినవే.
అయితే, ఈ నవలలోని ఒక ఒంటరి ఆచార్యుడు (ప్రొఫెసర్) చొరకళలో తాను శోధించి సాధించిన అనేక విషయాలను తెలియజేయడానికి తగిన వ్యక్తి కోసం వెతుకులాడుతుంటాడు. అటువంటి సమయంలో ఒకరోజు ఓ సాధారణ చిల్లరదొంగ దొంగతనం చేయడం కోసం ఆచార్యుని ఇంట్లోకే జొరబడతాడు. తనకు దొరికిపోతాడు.
వాళ్ళిద్దరి మధ్య మాటా మంతీ జరుగుతుంది. మాటల సందర్భంలో ఆచార్యుడు కేవలం కంటిచూపుతో ఇంటికి వేసిన ఎటువంటి తాళాలనైనా తెరిచి లోపలికి వెళ్ళే విద్యను నేర్పిస్తానని ఆ దొంగకు అభయమిస్తాడు. ఇచ్చిన విధంగానే ఆ విద్యను నేర్పిస్తాడు కూడా.
ఆ విద్యను నేర్చుకున్న దొంగ కంటిచూపుతో అలఓకగా ఇండ్ల తాళాలను తీస్తూ సంపదను కొల్లగొట్టడం మొదలు పెడతాడు. దానిఫలితంగా ఆ దొంగ జీవితంలో ఎటువంటి పరిణామాలు సంభవించాయో ఈ నవలా రచయిత ఎంతో ఆసక్తిగా వివరించడం జరిగింది.
అయితే, ఇదంతా నాణానికి ఒక పార్శ్వం మాత్రమే. మరో పార్శ్వం ఏమిటంటే!? దొంగతనం వృత్తిని ఊతంగా తీసుకుని నవలాకారుడు అనేక సామాజిక, ఆథ్యాత్మిక విషయాలను లోలోతుల్లోకెళ్ళి పాఠకులు సంభ్రమాశ్చర్యాలకు లోనయ్యే విధంగా చెప్పుకురావడం, చదువుతున్న పాఠకులకు అనూహ్యంగాను, అద్భుతంగానూ అన్పిస్తుంది.
అవేమిటో పరిశీలిస్తే.. .
ఒకసాధారణ పాఠకుడిగా నేనీ పుస్తకం చదివిన తరువాతనే సుబ్రమణ్యస్వామి దొంగలకు ఆరాధ్యదైవమని తెలుసుకుని అచ్చెరువొందాను.
దొంగతో కొంతసేపు మాట్లాడిన ఆచార్యుడు ఆదొంగలో వున్న అజ్ఞాన బంధనాలను తన శాస్త్రజ్ఞానంతో తుత్తునీయాలు చేయాలనుకుంటాడు.
“మనం ఒకపనిని రకరకాలుగా చెయ్యవచ్చు. ఉదాహరణకు దొంగతనాన్ని పాపకార్యంగానో లేదా పుణ్యకార్యంగానోకూడా చెయ్యవచ్చు. మరోరకంగా చెప్పాలంటే ఒకవ్యక్తి తన భార్యకు ముద్దుపెడతాడు. ఆదే వ్యక్తి కూతురుకీ ముద్దుపెడతాడు. ఇక్కడ ముద్దుపెట్టడం అనే చర్య ఒకటే అయినప్పటికీ దాని ప్రతిఫలనం వేరు వేరుగా వుండడమనేది అందరికీ తెలిసిన సత్యమే కదా? భార్యకు పెట్టిన ముద్దు కామ ప్రేరకమైతే, కూతురుకి పెట్టిన ముద్దు వాత్సల్య ప్రేరకం. అట్లా ఒకడు తన వివేకాన్ని కర్మకు సమర్పించినకొద్దీ వాడందులో ప్రావీణ్యుడవుతాడు. ఒకదొంగ విషయంలోనూ అదేవిధానం కొనసాగుతూవస్తుంది. దొంగ అన్నింటికంటే ముందుగా సాధించవలసింది మానసిక దృఢత్వం” అంటూ ఆచార్యుడు చోరశాస్త్రంలోని మూలసూత్రాన్ని దొంగకు వివరిస్తాడు. రోజులు గడుస్తున్నాకొద్ది కంటిచూపుతో ఇండ్లకున్న ఎటువంటి తాళాలనైనా తెరవగల విద్యను నేర్పుతాడు.
ఇంకా పిల్లి నుండి చప్పుడు కాకుండా నడవడం, చిరుత నుండి వేగాన్ని అలవర్చుకోవడం, సాలీడు నుండి కదలకుండా వుండడం, నక్కనుండి కపటాన్ని, కొంగకుండే ఓర్పును అలవర్చుకోవాలంటూ బోధిస్తాడు.
ఒక్కమాటలో చెప్పాలంటే ఈఅనంత విశ్వమే ఓచోరపాఠశాల. అది దొంగ చేతివేళ్ళ కొనల్లో సూక్ష్మరూపంలో దాగివుంటుంది. మంచిదొంగ అనేవాడు ఆకర్షణలకు లోబడకూడదు. తన బలహీనతలను గుర్తెరిగి వాటికి దూరంగా వుండాలి” అంటూ మరికొన్ని చోరకళా నైపుణ్యాలను వివరిస్తాడు.
ఈనవలలో మరో విశేషం ఏమిటంటే!? రాజు - పేద (సీ.యన్టీఆర్) సినిమాలో రేలంగి జేబులో వుండే బొమ్మ మాదిరిగా శతాబ్దాలనాటి కిందట ఆ ప్రాంతాన్ని పరిపాలించిన ఓరాజు ముఖచిత్రంతో వున్న నాణెం ఒకటి దొంగ చేతికి వస్తుంది. దాన్ని నిరంతరం తన పంచేలో దోపుకుని తిరుగుతుంటాడు. ఏదైనా విషయంలో అంతిమ నిర్ణయం తీసుకోవాల్సి వచ్చినప్పుడు దాన్ని గాలిలోకి ఎగరేసి నిర్ణయం తీసుకుంటుంటాడు.
ఆబొమ్మ దొంగకు సంబంధించిన ప్రతిసందర్భాన్నీ తనలో తాను తర్కించుకుంటుంది. చదువుతున్న పాఠకులకు ఈ ప్రక్రియ వినూత్నంగా అన్పిస్తుంటుంది. రచయిత నిర్వహించిన చమత్కారానికి ఒక నిదర్శనంగా నిలుస్తుంది.
ఒక సందర్భంలో దొంగ రాజకీయ నాయకులను గురించి తనలో తను గుణించుకుంటున్న సందర్భంలో “రాజకీయ నాయకులంటేనే తెలివి మీరిన దొంగలు. నాలాంటి చోటా మోటా దొంగలంటే వాళ్ళకు లెక్కే వుండదు. ఒక నిజమైన దేశభక్తుడు మాదిరిగా అలీనోద్యమ సిద్ధాంతాలను నిబద్ధతతో పాటిస్తాడు. తినడానికి తిండి, దారి ఖర్చులు ఇస్తానంటే ఆ రోజుకి, ఏ పార్టీకైనా తన మద్ధత్తు ప్రకటించి, ఆపార్టీ జెండాను భుజాన వేసుకుని మోసి వాళ్ళ ఊరేగింపులో ప్రధానపాత్ర పోషిస్తూ విజయవంతం చేస్తాడు. తన వృత్తిపరమైన నైపుణ్యాన్ని మెరుగులు దిద్దుకునేందుకు, కొత్త పరిశోధనలకు ఆ ఊరేగింపులను చక్కగా వాడుకుంటాడు” అనుకుంటూ ఎన్నో విషయాలను పాఠకుల మనసుల్ని తాకేలా వివరించిన దొంగ (రచయిత) అవగాహన వాస్తవానికి అతి దగ్గరగా అన్పిస్తుంది.
దొంగ ధనవంతుడై తొమ్మిది ద్వారాలతో ఓ అతిపెద్ద నేలమాళిగాను నిర్మించి, అందులో taaను దోచుకొచ్చిన సంపాదనంతా దాచిపెడుతుంటాడు. ఆక్రమంలో వాడికో శిష్యుడు కూడా లభిస్తాడు. కళ్ళే మనిషికి అసలైన దీపాలని, అవి తెరుచివున్నప్పుడు కనిపించేవాటి కంటే మూసివున్నప్పుడు మరింతబాగా కన్పిస్తుందని, అదే అసలైన సత్యమనికూడా దొంగకు తెలిసొస్తుంది. దాంతో అతను చూసిన దానికంటే చూడనిడానికి గురించి మరింతగా ఆలోచన చేస్తుంటాడు. అతనికి జీవితమంటే వెలుగును దొంగిలించి జాగ్రత్తగా దాయడం కింద మారింది.
ఈ సందర్భాన్ని ఆథ్యాత్మికంగా పరిశీలించి చూస్తే తొమ్మిది ద్వారాలున్న ఆ దొంగ ఇల్లు మానవదేహమని, ఆ దేహాన్ని సాధారణ చూపుతో చూసినదానికంటే ఆథ్యాత్మికంగా లోచూపుతో చూస్తే కనిపించేతీరు అనూహ్యమైనదన్న విషయాన్ని రచయిత అంతర్ముఖీనంగా వివరించాడని పాఠకులకు అర్ధమవుతుంది.
చోరశాస్త్ర పారంగతుడైన గురువు (ప్రొఫెసర్) కి తనకు అంతిమ ఘడియలు దగ్గరపడ్డాయని అర్ధమైనప్పుడు శిష్యుణ్ణి తన దగ్గర కూర్చోబెట్టుకొని “భూ గృహాల్లో కుళ్లిపోయే సంపద వల్ల ఎవరికీ ప్రయోజనంలేదు. తన ఇంటి గుమ్మం ముందు ఆకలితో అలమటిస్తున్న వాళ్ళను పట్టించుకోకుండా ఓమనిషి తన భూగృహాన్ని సంపదతో కుక్కుకునే ప్రయత్నంలోనే కాలమంతా వెళ్ళబుచ్చుతాడు. చివరికి కష్టపడి నిర్మించుకున్న సామ్రాజ్యాన్ని కళ్ళముందే కోల్పోతాడు. మరొకడు దానిని ఆక్రమించుకోడానికి ముందుకొస్తాడు. మతంలో నైనా రాజకీయాల్లో నైనా వ్యక్తిగత జీవితంలో నైనా మనం అదేచూస్తాం. ఏదైతే నీది అనుకుంటావో వాస్తవానికి అది నీదికాదు.
ప్రతివాడూ ఈ భూమ్మీదికి వచ్చినప్పుడు ఈ అనంత విశ్వం నుంచి దొరికినంత వరకు దొంగిలించడానికి, దొంగగానే వస్తాడు. ఫలితంగా చెరసాల శిక్ష అనుభవిస్తాడు. ఇల్లే వాడి చెరసాల. వాడి కాళ్ళు చేతులు ఐహిక వ్యామోహాలనే తాళ్ళతో కట్టివేయబడతాయి. భార్య పిల్లలు అనే పాశం మెడకు తగులుకుంటుంది. రాళ్ళతో నిర్మించిన మాయ అనే చెరసాలలో వాడు బందీ అయిపోతాడు. వాడి అజ్ఞానం పెరిగినకొద్దీ గోడల మందం కూడా పెరుగుతుంది. కోపం, గర్వం, కామం అనే సైనికులు ఆ ఖైదీకి కాపలాగా నిలబడతారు. వాడికి అన్నీ వుండవచ్చు, అందరూ వుండవచ్చు కానీ అవన్నీ నీతో ఎల్లకాలం వుంటాయన్న భ్రమలో వుండకూడదు. అవన్నీ నిన్ను వదిలిపెట్టి పోయే ముందే నువ్వు వాటిపట్టునుండి బయటపడాలి. అప్పుడు నువ్వు నిజమైన చెరసాల నుండి బయటపడినట్టు” అంటూ చోరశాస్త్రం మానవజాతికి అందించే అసలు సిసలు సారాంశాన్ని వివరిస్తాడు.
గురువు జ్ఞానబోధ ఫలితంగా శిష్యుని దృక్పథంలో ఎటువంటి మార్పు వచ్చింది? చివరికి అతని జీవితం ఎటువంటి మలుపు తిరిగింది?
అరవైనాలుగు కళల్లో ఒకటైన చోరకళ నిజంగా అది దొంగలకు దొంగతనాలను ఎలా చేయాలో? చేయవచ్చో? తెలియజేసేదా? లేదంటే మనిషి ఆథ్యాత్మికంగా తనను తాను వున్నతీకరించుకోడానికి అన్యాపదేశంగా ఉపయోగపడేదా? అన్న చోరశాస్త్రం తెలుసుకోవాలంటే పాఠకుడూ ఈపుస్తకాన్ని చదివి తెలుసుకుని, జీవితంపట్ల ఒక సరియైన అవగాహన పెంచుకోడానికి ప్రాయత్నించ వచ్చు. ఇటువంటి పుస్తకాలు చదివినప్పుడే మనకు శాస్త్రాలలో నిక్షింప్తం చేయబడిన అసలైన పరమార్ధాలు అవగతమౌతాయి. జీవితం విభిన్నంగా సాగిపోతుంది.
మళయాళ మూలరచయిత వి.జే. జేమ్స్,
ఇంగ్లీష్ అనువాదకులు
మోర్లే జె.నాయర్ గార్లతోపాటు
ఒక మంచి పుస్తకాన్ని తెలుగులోకి అనువదించిన అనువాదకుడు కుమార్ యస్ గారికి, నూతనత్వాన్ని ఆదరించే తెలుగు పాఠకుల వైశిష్ట్యాన్ని బలంగా నమ్మి ఈ పుస్తకాన్ని వెలువరించిన ఛాయా పబ్లికేషన్స్ వారికి అభినందనలు.
పుటలు : 131 ; వెల: రూ.175/- లు
పుస్తకం కోసం సంప్రదించాల్సిన నెంబర్ 70931 65151.
శిరంశెట్టి కాంతారావు.
